Акафист почаевской иконе божией матери читать на русском языке
Акафист Пресвятой Богородице пред Ея
Цельбоносною Стопою Почаевскою
Кондак 1
Взбранной Воеводе, избравшей гору Почаевскую в место
селения своего, похвальная восписуем Ти, раби Твои,
Богородице: яко от лет древних прославила еси место сие
богоносное явлением цельбоносныя стопы Твоея и Твоего
Божественнаго образа чудодействием. Темже, яко
избавльшая иногда обитель Твою от нашествия
агарянскаго, от всяких нас бед и напастей свободи, да всегда
Твоею помощию избавляемии из глубины душевныя вопием
Ти: Радуйся, похвало Почаевская, надеждо наша и утешение.
Икос 1
Ангели вси и человецы удивишася неизреченному
снисхождению Твоему, Дево Чистая: якоже бо Господь
древле явися Моисеови на Синаи, в купине горящей и
несгаряемей, сице явилася еси, Мати Чудная, на скале
Почаевстей в столпе огненнем стоящею, и знамение ноги
Твоея десныя, водою исполненное, благомощне тамо
изобразила еси, да вси чудо видяще вопием Ти: Радуйся,
Богородительнице чистая, назирающая ны с высоты
пренебеснаго жилища Твоего. Радуйся, Благая Одигитрие, до
конец земли во спасение наше досязающая. Радуйся, яко
светоносным явлением Твоим на горе Почаевстей гору сию
превыше множества гор, яже во странах наших, вознесла
еси. Радуйся, яко в снисхождении Твоем тако обители
Почаевстей славу во всем мире уготовила еси. Радуйся,
приснотекущий источниче, водою цельбоносною стопу
Твою Почаевскую непрестанно наполняющий. Радуйся,
наставнице Богомудрая, научающая ны благочестно
покланятися на месте, идеже стоясте Пречистыя нозе Твои.
Радуйся, похвало Почаевская, надеждо наша и утешение.
Кондак 2
Видящи, Пресвятая, немощь естества нашего и болезни,
одержащия присно души и телеса наша, даровала еси,
Пречистая, стопочней воде Твоей на скале Почаевстей
цельбоносную силу исцеляти всяк недуг и всяку язю в
людех: еяже благодать вящши паче древния купели овчия,
та бо единою в лето и токмо первее входящим в ню здравие
телу подаваше, сия же, присно освящаемая Твоею
благодатию, непрестанно дарует здравие душевное, купно
же и телесное всем с верою черплющим ю, емлющим и
пиющим от нея, мажущимся ею, и поющим Богу: Аллилуиа.
Икос 2
Разумом недоразуменным не возможе благоверная Анна,
строительница обители Почаевския, уразумети исперва,
коль великая благодать вселися в храмине ея, егда Неофит
именем, митрополит греческий, за сотворенное ему
гостеприимство в дому ея, дарова ей на благословение образ
Твой Честный, Владычице. Но ты сама, Мати Всемогущаго,
не умедлила еси явити славу Его знамениями и чудесы
многими, да аки от живаго источника, от Твоея иконы
благодеяньми многоразличными наслаждающеся, вопием
Ти сицевая: Радуйся, Дево Чистая, спасения нашего
Ходатаице Богоизбранная. Радуйся, Испоручнице роду
человеческому во утешение наше дарованная. Радуйся,
благая Домостроительнице, житие наше добре устрояющая.
Радуйся, Путеводительнице прозорливая, ко Отечествию
Небесному нас руководящая. Радуйся, многими от лет
древних иконами своими дивными Константинополь град
благодатне снабдевающая. Радуйся, едину от сих, аки звезду
пресветлую, от Востока православнаго до нашего Русскаго
запада, во спасение наше, даровавшая. Радуйся, похвало
Почаевская, надеждо наша и утешение.
Кондак 3
Сила Вышняго осени тогда слепаго от рождения болярина
Филиппа, егда теплосердечныя пролияше слезы пред
иконою Твоею, Богородице: во еже бы многомощною силою
Твоею, Владычице, даровала ему зрение. И се, молящуся ему,
абие отверзостеся очи его, аки бы древле от Христа
слепорожденному, и той взирая благодарне к дивному лику
Твоему, в радовании сердца своего вопияше Богу: Аллилуиа.
Икос 3
Имущи благоверная Анна в дому своем благодатную икону
Твою, чудесы неизреченными прославляемую, размысли
воистинну в сердце своем, яко недостойне есть, да толь
великая святыня пребывает сокровенна в храмине ея.
Темже убо, созвавши иноки со священники, и множество
народа православнаго собравши, со свещами и пением
благоговейным принесе тую икону на гору Почаевскую,
идеже в пещере обитающим иноком в вечное хранение
предаде, да благодеющей нам во оней Тебе, Мати Дево,
вопием вси благодарне: Радуйся, по Бозе и Царе
царствующих Царице наша, Богородице. Радуйся, по
Владыце и Господе господствующих Госпоже и Владычице.
Радуйся, явлением чудотворныя иконы Твоея землю
отечественную нашу просветившая. Радуйся, лучами чудес
Твоих Благодатне, во спасение наше, во всем мире
возсиявшая. Радуйся, честное вместилище
богопросвещеннаго разума, проразумевающая всюду
избранныя своя. Радуйся, теплотою Богоматерния любве
Твоея от любве земныя к небесней Божией любви нас
приводящая. Радуйся, похвало Почаевская, надеждо наша и
утешение.
Кондак 4
Бурею, внутрь страны нашея свирепеющею от власти
иноверныя, гонимый угодник Твой Иов, игумен Дубенский,
Богородице, тай остави обитель свою крестную, и во еже
сокрытися от треволнений мира сего прелестнаго, со
тщанием востече на гору Почаевскую, и припадши к
чудному образу Твоему, все упование свое возлагаше на Тя:
Мати Божия, взывая, сохрани нас под кровом Твоим, да
всегда Твоею помощию избавляеми, поем Богу Спасителю
нашему: Аллилуиа.
Икос 4
Слышана бысть во всех ближних и дальних странах, слава
Твоя, Пречистая, егда нашедшим исмаилитом на обитель
Почаевскую, един от иноков монастыря сего, от татарина
обезглавленный, взят абие главу свою отсеченную, и аки
вторый Ареопагит, принес ю до иконы Твоея, положи сию
пред нею, идеже купно и дух свой в руце Божии предаде,
научая всех звати Тебе: Радуйся, добрая Хранительнице
наша во страданиих телесных. Радуйся, Блюстительнице
неусыпная в печали душевней. Радуйся, яко пособствующей
любви Твоей, вси поклоняющиися Тебе со смирением благ
мира сего отрешаются. Радуйся, яко желанию Твоему
споследствуя, избраннии Тобою всех благ свыше
сподобляются. Радуйся, верных прибежище и ограждение.
Радуйся, благодати Божия светлое и неизреченное
познание. Радуйся, похвало Почаевская, надеждо наша и
утешение.
Кондак 5
Боготечной звезде, во мраце сияющей, уподобися святая
икона Твоя, Владычице, егда беззаконный наследник
приснопамятныя строительницы Почаевския, повеле силою
исхитити образ Твой из обители Почаевския, и сей купно со
иными вещьми, во обители пограбленными, в замку своем
Козинском заключи: аще бо, рече, возьму чудотворную
икону себе, иноцы не возмогут обитати на месте том, не
ведый силы Бога Живаго, ни еже тому единому пети:
Аллилуиа.
Икос 5
Видящи посрамление святыя иконы Твоея, явила еси,
Пречистая силу великую и преславную в дому вельможи
безбожнаго: егда бо той от радости безумныя не ведый, что
более творити, облече в ризы священныя во обители
Почаевстей пограбленныя супружницу свою, и купно с нею и
со иными многими на вечери у него сущими, начат хулити
Тебе, о Богомати, в чудотворней иконе Твоей, абие лют бес
истрясе злую жену за беззаконие ея, имже одержима бе,
донележе святая икона Твоя Почаевская не бе возвращена
на место свое со всякою честию и песнию псаломскою
преславною: Радуйся, граде Царя Великаго некрыемый
верху горы небесныя. Радуйся, покрове миру, ширший
облака, всюду приступный для нашего притекания. Радуйся,
веры православныя недвижимое сохранение. Радуйся,
еретических полков скорое и неумытное поражение.
Радуйся, яко Тобою побеждается всякое возношение,
взимающееся на разум Божий. Радуйся, яко снисхождением
Твоим утверждается всяк ум пленяющ себе в послушание
Христово. Радуйся, похвало Почаевская, надеждо наша и
утешение.
Кондак 6
Видена быша шествия Твоя, Царице Неба и земли, видена
быша шествия Твоя, Владычице, в явлении святыя иконы
Твоея на горе Почаевстей: яко сию яве прославила еси во
странах наших в годину искушения, находящую на ны купно
с порождением злощастныя оныя, глаголемыя берестейския
унии, да поне в явлении чудес и знаменьми
многоразличными от цельбоноснаго образа Твоего подаси
исповедником веры православныя и отеческаго древняго
благочестия поборником небесную свою отраду, облегчение
и утешение, во еже самим врагом нашим о Твоем ко
православным благоснисхождении чудящимся, пети Богу:
Аллилуиа.
Икос 6
Возсия солнца светлейши на горе Почаевстей тако
прославленная и превознесенная, дивная икона Твоя,
Владычице: пред нею же со смирением припадающе и
молящеся, со благодарением поминаем неисчетныя силы и
благодеяния, Тобою, Пречистая, от нея чудесне источаемыя,
поюще, вопиюще и взывающе Тебе радостно: Радуйся,
светом чудесным от святыя иконы Твоея пещеру
всеблаженнаго угодника Твоего и Отца нашего Иова
Почаевскаго, во едину от нощей молящуся ему пред нею,
благодатне озарившая. Радуйся, слепыя многи от омрачения
телеснаго, купно же и душевнаго, благомощно
просветившая. Радуйся, мужа умершаго жене его, по
молитве оныя воскресившая. Радуйся, юношу в Почаевский
глубокий кладезь упавшаго, на вервии посреде его чудесне
удержавшая. Радуйся, жидовину некоему свет паче солнца
от иконы Твоея показавшая. Радуйся, неверие его в веру
Христову светом сим благодатне претворившая. Радуйся,
похвало Почаевская, надеждо наша и утешение.
Кондак 7
Хотя Христос Господь и Сын Твой показати в Тебе,
Пречистая, новое знамение благодати Своея на горе
Почаевстей, любовию разже абие к образу Твоему сердце
именитаго болярина Феодора и Евы благородныя, жены его,
иже иждивением своим создаша во обители Почаевстей
Твоей церковь новую, великую, и сию, якоже Соломон
древле, потребами всякими удовлиша и украсиша,
прославляя единаго славимаго в церквах своих Бога, и Тому
поя усердно: Аллилуиа.
Икос 7
Дивная и преславная видена быша о Тебе, Пресвятая Дево,
во обители Твоей во время брани збаражския, егда явилася
еси верху горы Почаевския, от нашествия и обложения
агарянскаго монастырь Почаевский избавляя: и омофором
белоблестящимся покрывая люди Твоя, внимала еси яве
молитвам одесную Тебе стоящаго на облацех небесных
преславнаго Иова, чудотворца Почаевскаго, и тако враги
Твоя вспять погнала еси, научая всех благодарне
поминающих несказанное явление сие, звати Тебе: Радуйся,
Заступнице рода человеческаго твердейшая паче адаманта
несокрушимаго. Радуйся, Защитнице народа православнаго
вернейшая паче всякаго забрала необоримаго. Радуйся,
молние громоносная, стрелами невидимыми присно
поражающая врагов веры христианския. Радуйся, стрелы
агарянския, на Тебе в Почаеве от татаров направляемыя, на
главу их вспять обратившая. Радуйся, яко сего ради мнози
от них, христианскую приемше веру, на послушании
монастырском в обители Почаевстей даже до кончины своея
пребыша. Радуйся, яко правовернии, Тобою избавлении,
радостную Тебе песнь хвалы и благодарения воспеша.
Радуйся, похвало Почаевская, надеждо наша и утешение.
Кондак 8
Странно и страшно бе видети Тебе, Мати Благословенная,
тогда на воздусе, со Ангелами небесными, обнаженнии мечи
держащими на защиту народа православнаго. Сего ради
явлением Твоим устрашаемии нечестивии, абие спешне
отбегоша от обители Почаевския, во еже всем о Тебе,
Владычице, пети Богу: Аллилуиа.
Икос 8
Весь сый исполнен страха и надежды на Тя, Мати
многомощная, игумен Почаевский Иосиф и прочии
тогдашнии почаевстии иноцы и мирстии людие, от татаров
во обители обложении, в тузе сердечней вопияху к Тебе
Богородице: не даждь видети погибели служащих Тебе и
покланяющихся чудотворней иконе Твоей, но помози и
изми нас из рук агарянских, якоже иногда спасла еси
царствующий град Константинополь от скифскаго воеводы,
и потопила еси вои его, нападающия на град сей. Спасай и
нас, молим Тя, Дево Чистая, от всякаго зла и от всех козней
врагов наших видимых и невидимых, да Твоею помощию
избавляемии со умилением зовем Ти сицевая: Радуйся,
отечествию нашему Заступнице Всесильная. Радуйся, земли
рождения нашего Воеводо непобедимая. Радуйся,
Хранительнице наша во искушениих веры от врагов
правоверия. Радуйся, Споборнице наша бодрейшая сопротив
всякия власти чуждыя. Радуйся, присная помоще
православным христианом во всех делех и путех наших.
Радуйся, всей русской державе твердыне и забрало
необоримое. Радуйся, похвало Почаевская, надеждо наша и
утешение.
Кондак 9
Всякое естество удивися неизреченному действу силы
Твоея, Владычице Пренепорочная, еюже многомощне
исхитила еси от неволи инока почаевскаго, в пленении у
безбожных агарянов пребывающаго. В той бо неволи сущий
на ум себе приводяше пения церковная и службы, паче меда
сладчайшия, на горе Почаевстей. И се молящуся ему единою
в праздник успения Твоего, Преблагословенная, абие
обретеся во обители Почаевстей, вериги пленения на руцех
своих носяй, и с плачем благодать Твою, на себе бывшую
исповедуя, и благодарными усты поя Богу: Аллилуиа.
Икос 9
Ветийствующие многовещанно клеврети иноверия и власти
чуждыя во странах наших недоумеют и до ныне, еже како,
явивши святую икону Твою на горе Почаевстей, под сению
древняго благочестия, аще послежди тую в руце инославных
предати и соизволила еси, обаче паки сию, силою Твоею,
православным возвратила еси: мы же неизреченному
смотрению Твоему дивящеся, веруем и исповедуем, яко сие
тако сотворила еси в научение наше, купно же и вящшаго
ради прославления образа Твоего. Темже и златыми, яже от
Рима, диадимами благоволила еси увенчанну быти тому, да
от восток солнца до запад славимому присно имени Твоему
вопием вси благолепно: Радуйся, заре таинственнаго света
богосиянная. Радуйся, свеще, от Божественнаго пламене
восточнаго православия, теплотою чудес Твоих неугасимо
нас согревающая. Радуйся, Воеводо Почаевская, сердце
вельможнаго графа чудесне к себе обратившая. Радуйся,
новую Ти обитель, купно же и храм во имя Твое на горе
Почаевстей воздвигнути тому неизреченно внушившая.
Радуйся, яко не точию во странах русских, но и вне пределов
отечествия нашего призывающим Тя от святыя горы Твоея
благопоспешно вспомоществуеши. Радуйся, яко и во всем
мире благодать от святыя иконы Твоея Почаевския верным
неизреченно источаеши. Радуйся, похвало Почаевская,
надеждо наша и утешение.
Кондак 10
Спасти хотя уповающих на Тя, спасла еси обитель Твою от
ига иновернаго, Богородительнице, купно же с нею и
богодарованную славу пречистыя иконы Твоея, егда
благомощне возратила еси гору Почаевскую во одержание
православным: да в нас паки чудодействуя и от нас
прославляемая, явиши всем несказанно, яко воистину едина
есть святая церковь наша православная, от нея же исходит
всякий источник чудодейственныя благодати Божия,
напаяющий всех водами правоверия и единому Богу
Спасителю нашему научающий пети неложно: Аллилуиа.
Икос 10
Стену и заступление необоримое воистину исповедуем Тя,
Дево Мати, во всех потребах и обстояниих благостынею
своею присно нас ограждающую. Аще бо не бы Ты
предстала, Владычице, молящися о нас, кто бы нас избавил
от толиких бед; кто же бы ны сохранил до ныне свободны, в
державе нашей, на лоне святыя церкви православныя,
темже не таим Твоих благодеяний, но благодарне
прославляя милости Твоя, вопием Ти от полноты
сердечныя: Радуйся, помазанием водою от стопы Твоея
цельбоносныя прозрение многим даровавшая. Радуйся,
юношу от ядовитых струпов на теле уврачевавшая. Радуйся,
младенца умершаго, пред иконою Твоею родителями его с
верою положеннаго, к жизни неизреченно возвратившая.
Радуйся, врача иновернаго, дерзнувшаго хулити Тебе в
чудотворней иконе Твоей, умоизступлением страшным
наказавшая. Радуйся, возницу вельможи разьяреннаго от
неумытнаго разстреляния, по молитве к Той, несказанно
избавившая, Радуйся, и матерь градов русских, Киев от
смертоноснаго поветрия силою Твоею от горы Твоея святыя
благопоспешно спасшая. Радуйся, похвало Почаевская,
надеждо наша и утешение.
Кондак 11
Поют Тя вси роди земнии и небеснии, Покровительнице
наша, за вся неисчетныя благодеяния, знамения же и чудеса,
яже присно являеши всем почитающим Тя, и
покланяющимся иконе Твоей. Темже и мы, аще и
недостойни суще, приносим Ти, Мати Благословенная,
преискреннюю дань хвалы и умиления, и в веселии сердца
пред Пречистым Твоим образом поем Богу, дивная Тобою
творящему от горы Почаевския: Аллилуиа.
Икос 11
Светоприимную свещу зрим Тебе, Пресвятая Дево, на святей
иконе Твоей, посреде лика избранных угодников Твоих
лучами благодати Божественныя неизреченно
блистающуюся. Отонудуже во мраце грехов своих
просвещаемии и на светлую стезю добродетели и спасения
наставляемии, звании Тя почитаем сими: Радуйся,
молитвами Первомученика Стефана, венцу тезоименитаго,
венчающая нас венцем радования во скорбех наших.
Радуйся, заступлением Авраамиа, во иноцех затворника,
избавляющая нас от суеты мира сего многомятежнаго.
Радуйся, со Илиею Пророком, и ревнителем по Бозе, огнь
несокрушимыя ревности по вере во искушениих неверия и
иноверия в нас воспламеняющая. Радуйся, купно с
мучеником Миною страсти наша в борениих плоти
побеждающая. Радуйся, утешение наше во всех печалех,
предстательством Екатерины Великомученицы
прехвальныя. Радуйся, упование верным в напастех и
скорбех, ходатайствы Ирины Пречестныя и Параскевы
Преподобномученицы Богоблаженныя. Радуйся, похвало
Почаевская, надеждо наша и утешение.
Кондак 12
Благодатию, данною Ти от Сына и Бога Твоего,
чудодействующи, Пречистая, на святей горе Твоей
Почаевстей, не оставляеши, Владычице, рабы Твоя и во
время сие, но якоже во дни древния, сице и ныне, во очию
нашею подаеши присно недужным здравие, слепым
прозрение, скорбящим утешение, обидимым заступление,
бесным от духов лукавых свобождение, и всем сущим в
бедах и обстояниях многоразличных: от запаления
огненнаго, от татей и разбойников и тайных убийц, от злаго
поветрия губительнаго и смертоносныя язвы, и от тяжких
крушений на пути, в мори и на суше, избаву и сохранение,
имущи купно о нас великаго ходатая и молитвенника
неусыпнаго, блаженнаго Иова, игумена и чудотворца
Почаевскаго, да тмами тем притекающии к Тебе,
восприимем вси благая и полезная душам нашим,
прославляя Бога и тому Единому поя благодарне: Аллилуиа.
Икос 12
Поюще Твоя милости, Богородице, и чудеса Тобою во
спасение наше, от святыя горы Твоея Почаевския, в
цельбоносней стопе Твоей и Твоей чудотворней иконе выну
нам источаемыя, хвалим Тя вси, яко твердую
Предстательницу и необоримую Заступницу нашу, и со
умилением припадающе пред иконою Твоею, молим Твою
благостыню: воздвигни руце Твои к Сыну Твоему и Богу
нашему, сице на руку Твоею умильно держимому, да и в сей
жизни и по кончине нашей милосердие Его неотступно
будет от нас, но кийждо, по мере веры и любве своея,
восприемлет от Него поне некую отраду, облегчение и
утешение, да благодеющей Тебе и чудодействующей во
спасение наше во веки веков поем благодарне: Радуйся,
молитвами Твоими от святыя горы Твоея род человеческий
спасающая. Радуйся, всю вселенную благодатию от иконы
Твоея заступающая. Радуйся, всем во всякой потребе и
нужде водою от стопы Твоея полезная подавающая. Радуйся,
житие наше, молитвами угодника Твоего Иова Почаевскаго,
во всех нуждах и обстояниих наших добре устрояющая.
Радуйся, мирен конец жизни нашея в преставлении нашем
испрошающая. Радуйся, и по кончине нашей от мук адских
всех свобождающая и в Царствие Сына Твоего вечное
превождающая. Радуйся, похвало Почаевская, надеждо наша
и утешение.
Кондак 13
О Всепетая Мати, Царице неба и земли! Воззри милостивым
оком Твоим на ны, предстоящия пред святою иконою Твоею,
и на вся люди, Тебе молящиеся, и Твоими Богоматерними
молитвами избави нас от всяких бед, напастей и скорбей, да
безгрешно, мирно и благочестно поживше в нынешнем веце,
и в будущем сподобимся вси небесных и вечных благ от
Господа и Спаса и Судии Нашего, поюще Ему,
прославлящему Тя на святей горе Твоей, и Тобою от святыя
иконы Твоея и стопы Твоея прославляемому во веки веков:
Аллилуиа, Аллилуиа, Аллилуиа.
(Этот кондак читается трижды, затем икос 1 и кондак 1)
Молитва
О, Пресвятая Дево, Владычице Богородице! Благодарю Тя от
всего сердца моего, яко сподобила мя еси грешнаго и
недостойнаго раба Твоего предстати зде и покланятися на
святей горе Твоей. О, коликих благ удостоихся тако
многогрешный аз милосердием Твоим. Вижду, Пречистая, и
ужасаюся, и истаевает дух мой, зря воочию многоцелебный
сей источник благодати Твоея, егоже издревле во следе
святыя стопы Твоея неизреченно явила еси, и
всеблагоговейно покланяемся на месте, идеже стоясте
Девичестии нозе Твои, молю Тя, благословенная Надеждо и
Спасение душ и телес наших: омый мя цельбоносною водою
Твоею от всякия скверны плоти и духа, утоли благодатными
струями Твоими вся страсти моя сердечныя, уврачуй
каплями от приснотекущaгo источника Твоего вся недуги
моя телесныя, да, Тобою наставляемый, врачуемый и
избавляемый, воспеваю Тебе всеусердно: Радуйся,
источниче радости непрестаемыя, радуйся, точе доброты
неизреченныя. Радуйся, вожделений нечистых потопление,
радуйся, скверн всяких измовение. Радуйся, струе
световиднейшая во здравие верным от горы приосененныя
чащи благодать исцелений подавающая, радуйся, росо
небесная, свыше токи премудрости жаждущим истиннаго
познания ниспосылающая. Радуйся, похвало Почаевская,
спаси ны, молящияся Тебе, Надеждо наша и утешение.
Аминь.
Икона Божией Матери «Почаевская»
АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ «ПОЧАЕВСКАЯ»
Кондак 1
В збранной Воеводе родов христианских и страны нашея известней Избавительнице хвалебныя песни принесем, вернии, на святей горе Ея собравшеся; Ты же, яко имущая милосердие неизреченное, о Владычице Богородице, моления нашего, пред чудотворным Твоим образом возносимаго, не отвержи, да в умилении сердец зовем Ти:
Радуйся, похвало Почаевская и всего мира надеждо и утешение.
Икос 1
А рхангел Гавриил первее «Радуйся!» тебе приношаше, Владычице, егда зачатие Сына Божия благовествоваше, по преславнем же Успении Твоем вся Небесныя силы туюжде хвалу на Небеси Тебе непрестанно приносят; како убо мы, грешнии, своя гласы с гласы Безплотных совокупити дерзнем? Обаче, милосердие Твое ко всем кающимся поминающе, устне наша со страхом и любовию отверзаем, глаголюще сице:
Радуйся, милости бездно; радуйся, любве неистощимое море.
Радуйся, рода христианскаго благая Предстательнице; радуйся, обители Почаевския стено нерушимая.
Радуйся, православныя люди на гору Почаевскую узами любве привлекающая; радуйся, всякую печаль от душ их отгоняющая.
Радуйся, Еяже чудотворный образ, яко звезда, от горы Почаевския нас путеводствует; радуйся, Ейже возносимыя молитвы страстныя прилоги вскоре отражают.
Радуйся, явлением Своим на горе сей люди утешившая; радуйся, след стопы Твоея на ней нам оставившая.
Радуйся, верных присное дерзновение; радуйся, сумнящихся доброе утверждение.
Радуйся, похвало Почаевская и всего мира надеждо и утешение.
Кондак 2
В идевше пустынницы почаевстии и простец Иоанн Босый Пресвятую Богородицу на скале во огненном столпе явившуюся, след стопы Ея облобызаху и водою, зде от камени истекшею, окропляяся, вопияху Богу: Аллилуиа.
Икос 2
Р азум недоразумеваемый о явлении Твоем, Владычице, ищуще, в сицевом уповании утверждается, яко первее от агарян, послежде от еретиков оплот Православия на горе Почаевстей утвердити благоволила еси, сего ради в Твой святый храм приходяще, теплою верою сердца наша исполняем, глаголющи:
Радуйся, истинныя веры утверждение; радуйся, зловерия явное обличение.
Радуйся, древле в неопалимей купине синайстей известившаяся; радуйся, христианом в столпе огненном зде явившаяся.
Радуйся, яко в пещи горящей, росою спасеннии, Авраамстии отроцы Тя предвозвестиша; радуйся, яко водою от следа стопы Твоея исцеленнии благодать Твою проповедаша.
Радуйся, землю нашу, древле от агарян разоренную, явлением Твоим тогда утешившая; радуйся, и ныне многими знаменьми молящияся зде ободряющая.
Радуйся, кающихся скорое услышание; радуйся, подвизающимся помощь и прибежище.
Радуйся, и неведущих вразумление; радуйся, и малодушных укрепление.
Радуйся, похвало Почаевская и всего мира надеждо и утешение.
Кондак 3
С илу сугубыя благодати явила еси, Владычице, на горе Почаевстей, егда место явления Твоего по триех стех летех чудотворною иконою Своею обогатила еси, юже рукою святителя Неофита Эллина, из Москвы грядущаго, первее боярыне Анне даровала еси, потом же от нея во обитель Почаевскую прияла еси, радующимся людем и поющим Богу: Аллилуиа.
Икос 3
И мущи в дому своем икону Твою, Владычице, боярыня Анна и исцеление от нея слепорожденному брату своему Филиппу бывшее уведевши, абие духом ревности о славе Твоей возгореся и обитель из камене во имя пречестнаго Успения Твоего пустынником почаевским устрояет, в ней же чудотворному образу Твоему поклоняющися взывает сице:
Радуйся, сокровище богатное в Твоей святей иконе нам преподавшая; радуйся, святителя рукою дарованным образом Твоим землю нашу освятившая.
Радуйся, души наша от земнаго богатства отвращающая; радуйся, Славу Божию пети нас научающая.
Радуйся, яко чудеса Твоя зряще, к Небеси сердцы своими восхищаемся; радуйся, яко во обители Твоей, аки в преддверии рая обретаемся.
Радуйся, православныя люди иконою Твоею утешившая; радуйся, от всех стран молящияся люди во обитель Почаевскую призывающая.
Радуйся, Еюже вера умножается; радуйся, Еюже уныние отгонится.
Радуйся, иноков почаевских присное Радование; радуйся, мирских людей непостыдное Упование.
Радуйся, похвало Почаевская и всего мира надеждо и утешение.
Кондак 4
Б уря еретическаго неистовства на святую обитель Твою устремившися, Владычице, святую икону Твою рукою злых иконоборцев пленивши и на злохуление тех подвигши, вскоре гневом Божиим удержана бысть, егда невидимая сила безстудне пиршествующия хульники, аки Артаксеркса и Ирода, сляче и в недуг вверже, над святынею Твоею ругавшихся и не уведевших пети: Аллилуиа.
Икос 4
С лышаша иноцы почаевстии и вси православнии людие, яко святая икона Твоя по седминадесяти летех еретическаго пленения во святую обитель от посрамленных хулителей возвращается, абие на сретение ея изыдоша и плач свой на радость преложше, вопияху Тебе:
Радуйся, христианом прибежище; радуйся, еретиков обличение.
Радуйся, обитель Почаевскую иконы Твоея до конца не лишившая; радуйся, злохуление иконоборцев посрамившая.
Радуйся, яко в бедах не унывати и нас научаеши; радуйся, яко правосудию Божию веровати нам повелеваеши.
Радуйся, Еюже Православие во стране нашей утвердися; радуйся, Еюже и вся вселенная воплощенную Истину прияти сподобися.
Радуйся, долготерпению Божию подражающая; радуйся, в терпении люди Твоя утверждающая.
Радуйся, яко смиреннии Тобою утешение приемлют; радуйся, яко горделивии Тобою смиряются.
Радуйся, похвало Почаевская и всего мира надеждо и утешение.
Кондак 5
Б оготечная звезда ищущим спасения явилася еси, Владычице, к Солнцу Правды сих приводящая, якоже бо в земнем житии Твоем о людех предстательница к Сыну Твоему в Кане Галилейстей показалася еси, тако и по преславном Твоем на Небеса отшествии моления о верных, от конец земли приносимая, к Сыну Твоему возносиши и зде, на горе Почаевстей, исцеления многоразличная от Него людем подаеши, вопиющим Богу: Аллилуиа.
Икос 5
В идеша людие, на гору Почаевскую, якоже в древняя, тако и в последняя лета притекающии, множества исцелений, Тобою подаваемая, в желании спасения души своя утверждаху и о гресех своих покаяние теплое приношаху, вопиюще Тебе:
Радуйся, слепых прозрение и хромых исцеление; радуйся, бесных от демонов избавление.
Радуйся, плененнаго инока во обитель Твою на воздусе чудесне возвратившая; радуйся, младенца Симеона предумерша по молитве старицы воскресившая.
Радуйся, яко в сих знамениих сила древних чудес Твоих людем паки явися; радуйся, яко исцеления от святыя иконы Твоея и в последняя дни не оскудеша.
Радуйся, во всем мире источник исцелений от святых икон Твоих подающая; радуйся, паче сих духовными дарованьми молящияся обогащающая.
Радуйся, Еюже православнии роди хвалятся; радуйся, к Еяже помощи и маловернии притекают.
Радуйся, земнородных упование; радуйся, Небесных чинов радование.
Радуйся, похвало Почаевская и всего мира надеждо и утешение.
Кондак 6
П роповедницы славы Пречистая Девы явишася агаряне на обитель Почаевскую нашедшии и видения Пречистая Богородицы с преподобным Иовом первее не уразумевшии; егда бо стрелы, от них пущаемыя, паки на ня устремишася, абие силу Владычицы проразумевше и покаяние о безумии своем принесше, верою возопиша: Аллилуиа.
Икос 6
В озсия видение Твое, Владычице, на горе Почаевстей, егда братия обители, зело от агарян осаждаеми, с велиим воплем моление пред святою Твоею иконою и пред ракою преподобнаго Иова возношаше, егда же братия агаряны, видением сим смятенныя и бежащия, виде, абие с веселием воспе Тебе сице:
Радуйся, Избавительнице наша и спасение; радуйся, рода христианскаго присное вспоможение.
Радуйся, нечестивыя враги от Твоея святыни отгнавшая; радуйся, в покаяние их приводящая.
Радуйся, Еяже и невидимии спасения нашего врази трепещут; радуйся, Ейже Святии Ангели и преставльшиися праведницы на Небеси покланяются.
Радуйся, преподобнаго Иова в молитву с Собою приемшая; радуйся, агаряны ко Святому Крещению видением Своим приведшая.
Радуйся, яко Тобою вернии страх смертный в конец отложиша; радуйся, яко Тебе ради нецыи от агарян богобоязненнии иноцы зде явишася.
Радуйся, истины присное изъявление; радуйся, заблуждающимся доброе вразумление.
Радуйся, похвало Почаевская и всего мира надеждо и утешение.
Кондак 7
Х отящи желание вечнаго живота возгрети в сердцах христианских, Пресвятая Богородица болящия чудесы Своими исцеляет, бесы изгоняет, плененныя свобождает, мертвыя воскрешает, да мы вси, силу Божию уразумевше, земная возненавидим и о душах своих попечение приложим, непрестанно вопиюще Богу: Аллилуиа.
Икос 7
Н овыя и тягчайшия беды претерпе обитель Почаевская, егда вкупе со всею страною от Православия лестию отторженная во обладание еретиков вдадеся, обаче прошедшим стом и десятим летом паки православным христианом вдана бысть, в нюже православнии иноцы, пришедше и святыя мощи преподобнаго Иова из-под спуда изъемше, к чудотворному образу Владычицы припадаху, глаголюще:
Радуйся, Православия защитнице; радуйся, еретиков обличительнице.
Радуйся, обитель Твою до конца не оставившая; радуйся, страху Божию нас научающая.
Радуйся, яко предстательством Твоим страна Волынская паки ко Православию возвратися; радуйся, яко от лет древних мнози еретицы Твоим вразумлением исправишася.
Радуйся, во святую Лавру Твою верных на молитву паки призывающая; радуйся, и неверныя зде поклонятися православней святыне научающая.
Радуйся, Юже праведницы и праведнии непрестанно воспевают; радуйся, к Нейже и падшии в покаянии притекают.
Радуйся, отступников к вере возвращение; радуйся, прельщаемых к свету истины возведение.
Радуйся, похвало Почаевская и всего мира надеждо и утешение.
Кондак 8
С транное чудо зрим о Тебе, Богомати, елико бо телеснии недузи святыя Твоея иконы целованием и воды почаевския кроплением исцеляются, тако и душевныя страсти видением святыни Твоея отъемлются, вера утверждается и умиления сердца наша исполняются, поющих Богу: Аллилуиа.
Икос 8
В есь аз недостойный грехами исполнихся, мирскому разсеянию вдався и о души своей вознерадев, обаче на святую икону Твою, Владычице, взирая, и просвещение от нея безчисленным людем, зде приходящим, видя, паки на путь спасения устремляюся и в радости сердца воспеваю Ти сице:
Радуйся, чистоты сокровище; радуйся, милостей бездно.
Радуйся, к Сыну Твоему о верных моления выну приносящая; радуйся, моления грешных не отвергающая.
Радуйся, яко Тобою мнози отчаяния греховнаго избегоша; радуйся, яко призывающии имя Твое от падения страннаго восташа.
Радуйся, Еюже иконоборная ересь во вселенней посрамися; радуйся, Еюже истинная вера Волынской стране возвратися.
Радуйся, к подвигу целомудрия души возводящая; радуйся, обидящим прощати научающая.
Радуйся сердец наших умиление; радуйся, душ наших упование.
Радуйся, похвало Почаевская и всего мира надеждо и утешение.
Кондак 9
В сякия отступства и еретическая блуждания покаявшемуся народу земли Волынския отпустила еси, Владычице, и паки источник исцелений от чудотворныя Твоея иконы, от следа стопы Твоея на горе Почаевстей в православной Лавре Твоей людем открыла еси, токмо аще покаяние о гресех своих принесут Богу и, о Твоей помощи не сумнящеся, возопиют Ему: Аллилуиа.
Икос 9
В ития славы Твоея явишася, Владычице, слепии и хромии исцеление от Твоея иконы, православным людем возвращенныя, приявшии, яко и еретической жене некоей болящей, Тя в помощь призвати и по исцелении истинную веру исповедати и облобызати, нам же вопити Тебе сице:
Радуйся, Царя Небеснаго умоление; радуйся, земных присное предстательство.
Радуйся, от лютерских заблуждений жену некую недуга исцелением отвратившая; радуйся, вся люди во истине Православия уверившая.
Радуйся, яко Тебе ради православнии людие столькраты прельщения агарянская победиша; радуйся, яко Тебе ради и совращеннии от латын паки православную веру облобызаша.
Радуйся, к Нейже вси живущии молитвенно очи воздвизают; радуйся, Юже и молящиися о упокоении умерших в помощь призывают.
Радуйся, и от житейских нужд притекающия к Тебе изъемлющая; радуйся, паче сих всякия нужды претерпевающим крепость дарствующая.
Радуйся, христолюбивому воинству во бранех вспоможение; радуйся, на демоны воинствующим благое наставление.
Радуйся, похвало Почаевская и всего мира надеждо и утешение.
Кондак 10
С пасти хотящи Пречистая Богородица препростую некую старицу, во ослеплении латынстем бывшую и внуку малую имущую, Православием убо просвещенную, но телесными очесы слепотствующу, сима обема благое желание влагает, еже на горе Почаевстей чудотворному Ея образу поклонитися, идеже абие слепую отроковицу чудесне исцеляет и старицу православную веру исповедати научает, вопиющую Богу: Аллилуиа.
Икос 10
С тена нерушимая истинныя веры явилася еси, Владычице, зане, якоже нечестивии еретицы от прославления Тебе, яко Истинныя Богородицы, со упорством отвергошася, тако и православнии в вере Твоей тверди пребыша и от молитв, непрестанно Тебе приносимых, николиже отвратитися восхощут, и сих ради еретических глагол во ушеса своя приимати не дерзнут, но сердцем благодарным восхваляти Тя не престанут, глаголюще:
Радуйся, христианом отрадо и утешение; радуйся, ангельским чином славо и поклонение.
Радуйся, от льстивых глагол еретических нас отвращающая; радуйся, памятованием милостей Твоих умы наша к Богу возносящая.
Радуйся, святыя Апостолы ко Успению Твоему на облацех воздушных призвавшая; радуйся, и грешныя люди в той день на гору Почаевскую в тысящах и тмах на всяко лето собирающая.
Радуйся, Еяже ради христиане трудность пути, аки сладкое упокоение, подъемлют; радуйся, Еяже ради и ленивии подражати им тщатся.
Радуйся, иноком сладость мирскую забыти благодатию Твоею пособствующая; радуйся, вспять озирающияся сновиденьми грозными устрашающая.
Радуйся, Церкве Христовы лучшая диадимо; радуйся, страны нашея щите неодолимый.
Радуйся, похвало Почаевская и всего мира надеждо и утешение.
Кондак 11
П ение благодарное о Твоих, Владычице, благодеяниях во всем мире от христиан возносимое, аки фимиам, к Небеси непрестанно восходящий, помышляюще, и наша убогая хваления не отвратити Тебе просим, еще же и благодать покаяния даровати Тебе молим, со упованием поюще Богу: Аллилуиа.
Икос 11
С вет живота временнаго и вечныя жизни упование явилася еси, Владычице, человеку некоему в Бессарабии умрети имущему, но внезапу, по вкушении воды от святыни Почаевския, здраву бывшему, еже сродницы его видевше, со страхом и умилением Тебе воззваша:
Радуйся, болящих исцеление; радуйся, скорбящих слышание.
Радуйся, яко предвещание Гавриила пред очию нашею сбывается; радуйся, яко от всех родов, по глаголу Твоему, ныне и присно ублажаешися.
Радуйся, гору Почаевскую, яко место пребывания Твоего освятившая; радуйся, аки вторый Назарет тую явившая.
Радуйся, Яже никогоже упования отвратившая; радуйся, всех молитвы тепле приемлющая.
Радуйся, здравие нам подавающая; радуйся, ко спасению нас возводящая.
Радуйся, похвало Почаевская и всего мира надеждо и утешение.
Кондак 12
Б лагодать исцелений и умиления молитвеннаго от Твоея, Владычице, иконы источаемая, да не вотще душам нашим будет, аще бо грех ради во окамененное безчувствие впадохом, обаче, яко имущая власть мертвыя воскрешати, и наше пробуди душевное омертвение и помыслом лучшим сердца наша озари, да, греховную прелесть возненавидевше, воспоем Богу: Аллилуиа.
Икос 12
П оюше Твоя чудеса во обители Почаевстей явленная, молим Тя, Владычице, лица Твоего от страны нашея не отврати, но и всем приходящим на святую гору Твою и милости от Тебе ищущим во благое прошение исполни, да вси воспоют Ти сице:
Радуйся, всеправеднаго Бога умилостивление; радуйся, христиан ко Христу дерзновение.
Радуйся, торжество веры в Лавре Твоей являющая; радуйся, сердца человеков любовию распаляющая.
Радуйся, яко древним чудесем подобное зде видети людие сподобишася; радуйся, яко гора сия, аки вторый Синай, в странах христианских прославися.
Радуйся, Бога, на земли явльшагося, во чреве Твоем понесшая; радуйся, человеки молитвою Твоею к Богу возносящая.
Радуйся, икону Твою, яко проповедницу спасения во обители Твоей оставившая; радуйся, след стопы Твоея, целебною водою исполняемый, чудесы прославившая.
Радуйся, с небесных высот на рабы Твоя призирающая; радуйся, на благия деяния верныя наставляющая.
Радуйся, похвало Почаевская и всего мира надеждо и утешение.
Кондак 13
О Всепетая Мати Христа Бога, вся роды христианския любовию Себе всыновившая, достойныя похвалы воспети Тебе недоумеем мы, грешнии, обаче, любовию Твоею побеждаемии и к Твоему чудотворному образу очи своя возносяще, молим Тя: в борении и нуждах наших не остави чад Твоих, заступлению Твоему тепле верующих и Сыну Твоему вопиющих: Аллилуиа.
Этот кондак читается трижды, затем икос 1-й «Архангел Гавриил…» и кондак 1-й «Взбранной Воеводе…».
Молитва
К Тебе, о Богомати, молитвенно притекаем мы, грешнии, чудеса Твоя, во святей лавре Почаевстей явленная, поминающе и о своих сокрушающеся прегрешениих. Вемы, Владычице, вемы, яко не подобаше нам, грешным, чесого просити, токмо о еже Праведному Судии беззакония наша оставити нам. Вся бо нами в житии претерпенная, скорби же, и нужды, и болезни, яко плоды падений наших прозябоша нам, Богу сия на исправление наше попущающу. Темже вся сия истиною и судом Своим наведе Господь на грешныя рабы Своя, иже в печалех своих к заступлению Твоему, Пречистая, притекоша и во умилении сердец к Тебе взывают сице: грехов и беззаконий наших, Благая, не помяни, но паче всечестнеи руце Твои воздвигши, к Сыну Твоему и Богу предстани, да люте содеянная нами отпустит нам, да за премногая неисполненная обещания наша лица Своего от рабов Своих не отвратит, да благодати Своея, спасению нашему пособствующия, от душ наших не отымет. Ей, Владычице, буди спасению нашему Ходатаица и, малодушия нашего не возгнушавшися, призри на стенания наша, яже в бедах и скорбех наших пред чудотворным Твоим образом возносим. Просвети умиленными помыслы умы наша, веру нашу укрепи, надежду утверди, любве сладчайший дар сподоби нас прияти. Сими убо, Пречистая, дарованьми, а не болезньми и скорбьми живот наш ко спасению да возводится, но, от уныния и отчаяния души наша ограждающи, избави нас, маломощных, от находящих на ны бед, и нужд, и клеветы человеческия, и болезней нестерпимых. Даруй мир и благоустроение жительству христианскому предстательством Твоим, Владычице, утверди Православную веру в стране нашей и во всем мире. Церковь Апостольскую и Соборную умалению не предаждь, уставы святых отец на веки непоколебимы сохрани и всех к Тебе притекающих от рова погибельнаго спаси. Еще же и ересию прельщенных братий наших или веру спасительную в греховных страстех погубивших паки ко истинней вере и покаянию приведи, да вкупе с нами, Твоему чудотворному образу покланяющеся, Твое предстательство исповедят. Сподоби убо нас, Пресвятая Госпоже Богородице, еще в животе сем победу истины Твоим заступлением узрети, сподоби нас благодатную радость прежде кончины нашея восприяти, якоже древле насельники Почаевския Твоим явлением победители и просветители агарян показала еси, да вси мы благодарным сердцем вкупе со Ангелы, и пророки, и апостолы, и со всеми святыми, Твое милосердие прославляюще, воздадим славу, честь и поклонение в Троице певаемому Богу Отцу, и Сыну, и Святому Духу, во веки веков. Аминь.
Тропарь, глас 5
П ред святою Твоею иконою, Владычице, молящиися исцелений сподобляются, веры истинныя познание приемлют и агарянская нашествия отражают. Темже и нам, к Тебе припадающим, грехов оставление испроси, помыслы благочестия сердца наша просвети и к Сыну Твоему молитву вознеси о спасении душ наших.
Кондак, глас 1
И сточник исцелений и веры Православныя утверждение Почаевская Твоя икона, Богородице, явися, темже и нас, к ней притекающих, от бед и искушений свободи, лавру Твою невредиму сохрани, Православие во окрест стоящих странах утверди и грехи разреши молитвенник Твоих: елика бо хощеши, можеши.